மாதம்
மாதம் (month) அல்லது மாசம் அல்லது திங்கள் என்பது ஒரு கால அளவாகும். மாதம் என்ற ஒரே சொல்லே பல்வேறு சமுதாயங்களில் புழக்கத்திலுள்ள, இதையொத்த ஆனால் சிறிது வேறுபடுகின்ற கால அளவுகளைக் குறிக்கப் பயன்பட்டுவருகின்றது. வெவ்வேறு பண்பாடுகளில் இக் காலக் கணிப்பிற்குரிய அடிப்படைகள் வெவ்வேறாக அமைந்திருப்பதாலேயே மாறுபட்ட கால அளவுகளைக் கொண்ட மாதங்கள் வழக்கிலுள்ளன. சிறப்பாக இரண்டு வகையான மாதங்களைக் குறிப்பிடலாம்.
சர்வதேச அளவில் பயன்படுத்தப்படும் கிரிகோரியன் நாட்காட்டி போன்ற உரோமானிய நாட்காட்டி முறையிலிருந்து உருவாக்கப்பட்ட நாட்காட்டிகள், ஆண்டை 12 மாதங்களாகப் பிரிக்கின்றன. ஒவ்வொரு மாதமும் 28 முதல் 31 நாட்கள் வரை நீடிக்கும். மாதங்களின் பெயர்கள் ரோமுக்கு முக்கியமான பல்வேறு லத்தீன் பெயர்கள் மற்றும் நிகழ்வுகளிலிருந்து ஆங்கிலமயமாக்கப்பட்டன, 9–12 மாதங்கள் தவிர, அவை லத்தீன் எண்களான 7–10 (septem, octo, novem, and decem) எனப் பெயரிடப்பட்டுள்ளன, ஏனெனில் அவை முதலில் ரோமானிய நாட்காட்டியில் ஏழாவது முதல் பத்தாவது மாதங்கள் வரை இருந்தன.[1] நவீன கிரிகோரியன் நாட்காட்டியில், பிப்ரவரி மாதமானது நெட்டாண்டில் 29 நாட்களையும் மற்ற ஆண்டில் 28 நாட்களையும் கொண்டுள்ளது.
சூரியமாதம் என்பது, பூமிக்குச் சார்பாகச் சூரியனுடைய இயக்கத்தை அடிப்படையாகக் கொண்டது. இந்தச் சார்பு இயக்கத்தில், சூரியன் பூமியை ஒரு முறை சுற்றி வருவதுபோல் தோன்றும் காலம் ஒரு ஆண்டு ஆகும். பூமியை மையமாகக் கொண்டு அதைச் சுற்றிய அண்டவெளி, ஒவ்வொன்றும் 30 பாகைகள் கொண்ட 12 பிரிவுகளாகப் பிரிக்கப்பட்டுள்ளது. இந்த ஒவ்வொரு பிரிவும் ஒரு இராசி எனவும், 12 இராசிகளினதும் தொகுதி இராசிச் சக்கரம் எனவும் அழைக்கப்படுகின்றன. பூமியைச் சுற்றிய சூரியனின் சார்பு இயக்கத்தில் இந்த ஒவ்வொரு இராசியிலும், சூரியன் இருக்கும் காலப்பகுதியே சூரியமாதம் ஆகும். இந்தியாவில் மலையாளிகளும், தமிழரும் சூரியமாத முறையையே பின்பற்றுகிறார்கள்.
சந்திரமாதம் என்பது, சந்திரனானது பூமியை ஒரு முறை சுற்றி வர எடுத்துக்கொள்ளும் கால இடைவெளியாகும். சந்திரமாதத்தைக் கைக்கொள்ளும் சில சமுதாயங்களில் ஒவ்வொரு மாதமும் பூரணையில் தொடங்கி அடுத்த பூரணை வரையிலான காலமாக இருக்க, வேறு சில பண்பாடுகளில் மாதம், ஒரு அமாவாசையில் தொடங்கி அடுத்த அமாவாசைக்கு முன் முடிவடைகிறது. வட இந்தியாவில் பெரும்பாலும் சந்திரமாதமே புழக்கத்தில் உள்ளது. இஸ்லாமியர்களும் இம்முறையையே கடைப்பிடித்து வருகிறார்கள்.
இவற்றைவிட அனைத்துலக அளவில் இன்று புழங்கி வருகின்ற முறையின்படி, மாதம் என்பது நேரடியாகச் சந்திரன் அல்லது சூரியனின் இயக்கத்தை வைத்துக் கணிக்கப்படுவதில்லை.
மேற்கோள்கள்
தொகு- ↑ Macrobius, Saturnalia, tr. Percival Vaughan Davies (New York: Columbia University Press, 1969), book I, chapters 12–13, pp. 89–95.
|
இக்குறுங்கட்டுரையைத் தொகுத்து, விரிவாக எழுதி, நீங்களும் இதன் வளர்ச்சிக்கு உதவுங்கள். |